Za burskim blidom sej zaspěwali

Serbske Nowiny20. März 2023

Auf dem Njepila-Hof in Rohne wurde am vergangenen Sonnabend der traditionelle sorbische Bauerntisch gestaltet und man sang dort zusammen. Foto: Jost Schmidtchen

 

Za burskim blidom sej zaspěwali. (Jos / SN)

Rowno (JoS/SN). Na serbske burske blido su minjenu sobotu na Rownjanski Njepilic statok přeprosyli. Kóždolětne zarjadowanje bě spěchowanske towarstwo Njepilic statoka něhdy jako jedne z prěnich krutych terminow do zarjadowanskeje protyki zapřijało. Zaměr bě, zo starši Rownjenjo a wobydlerjo z wokolnych wsow wo swojich dopomnjenkach na zašłe časy rozprawjeja. Te su napisali a w archiwje składowali. Rudi Krawc je wšitko filmował a fotografował. Na te wašnje nastaty fundus je w běhu lět na wulki pokład narostł, z kotrehož w Rownom hišće dźensa čerpaja. Ći pak, kotřiž su hišće před lětami swoju wědu dale sposrědkowali, dźensa hižo mjez žiwymi njejsu. Tež Rudi Krawc nic.

Burske blido minjenu sobotu je Rownjanska Domowinska skupina hromadźe ze spěchowanskim towarstwom Njepilic statoka  organizowała. „Tónraz chcychmy sami aktiwni być“, praji předsyda towarstwa Manfred Nikel. „Tohodla smy so lětsa rozsudźili, zhromadnje spěwać. Předewšěm chcychmy swoje stare Slepjanske pěsnje zanjesć.“ K tomu su sej towarstwo Kólesko přeprosyli a tež spěwar Gerald Schön bě přišoł. Zhromadnje zaspěwachu melodije ze Slepjanskeho spěwnika, kotryž běchu Dieter Redo, Hartmut Hančo a Juliana Kaulfürstowa zestajili a wudali. Něchtóžkuli při tym cyle připódla swoje kmanosće slepjanšćiny wudospołnješe. Tu abo tamnu wjesnu stawizničku zašłeho abo nowšeho časa sej tohorunja powědachu. Wonkownje rjany wobraz bě, zo běchu nimale wšitcy wobdźělnicy w tradicionalnej serbskej drasće přišli.

SB slěpjańšćina – Schleifer Sorbisch DEDeutsch – němski